Nakasakmit ang kapulisan sa Bunawan og kapin P1.5 milyon ang kantidad sa pinaugang dahon sa marijuana human mismo gi-surrender sa usa ka inahan ang iyang 20-anyos nga anak nga usa ka construction worker.
Ang operasyon nahitabo alas 9:30 sa buntag dihang mitawag si alyas “Alice,” 42 anyos, residente sa Purok 6-A Aplaya, Bunawan, uban sa iyang common-law partner aron mangayo og tabang sa kapulisan.
Nasayran nga namatikdan sa inahan ang katingalahan nga lihok sa iyang anak ug nakit-an niini ang usa ka bag nga adunay daghang pinaugang dahon sa marijuana nga giputos sa transparent cellophane.
Sa pagsusi sa mga otoridad, nakumpiska nila ang gibana-banang 1,000 grams sa pinaugang marijuana lakip ang usa ka black nga giputos sa plastic cellophane ug ang bag nga gisudlan niini.
Gidala dayon sa kostudiya sa kapulisan ang dinakpan ug giandam na ang kaso nga ipasaka batok kaniya.
Padayon sab ang imbestigasyon sa Bunawan PNP aron masuta kung asa gikan ug kinsa ang nag-supply sa iligal nga droga.
