Gipahibalo sa regional office sa Department of Labor and Employment (DOLE 11) nga adunay mokabat sa 4,370 ka mga bakanting trabaho nga mamahimong maaplayan sa umaabot nga 2024 Kalayaan Job Fair sa Gaisano Mall of Davao alayon kini sa selebrasyon sa 126th Independence Day karong Hunyo 12, 2024.
Gikanayon ni DOLE 11 Senior Labor and Employment Officer Jennelyn Sanchez nga ang job fair ang pagasalmutan sa kwarentay kwatro ka mga local ug overseas employers.
Gidugang sab sa opisyal nga adunay online pre-registration nga kini giabrihan na niadtong Hunyo dos. Nasayran nga sa pagkakaron adunay dul-an usa kalibo na ang pre-registered applicants.
Ang mga bakanteng trabaho dinhi sa lokalidad ang gilangkuban sa boiler operator, refrigeration aircon technician, liquid line operator, accounting staff, cream filling machine operator, farm laborer, audit staff, IT assistant, machine operator, construction laborer,corporate sales, assistant secretary,mason, product manager, ug HR assistant, lakip sab ang sales representative, technical support,accounting clerk, processing assistant,salesman, delivery helper, customer service representative,regulatory pharmacists, software developer, ug salesperson.
