DAVAO CITY – Gipukaw sa nahitabong dagkong sunog ang mga residente sa Barangay Leon Garcia, Agdao, Davao City, kaganihang kaadlawon.
Subay sa taho, alas-dose sa kaadlawon dihang nagsugod ang kalayo sa usa ka balay nga nitakod og milamoy sa gibana-banang dos syentos ka mga panimalay sa mga silingang purok sa San Vicente, San Roque, Sto. Nino sa Barangay Leon Garcia, Agdao, ning dakbayan.
Niabot sa 3rd alarm ang pagresponde sa mga kabumberuhan gumikan sa halapad nga pagkatag sa dagkong kalayo.
Apan gikumpirma sab sa kabumberuhan nga walay nangakabsan sa kinabuhi atol sa insidente.
Gipaningkamutan usab sa mga bombero ang pagpalong sa mga nasunog nga balay hangtod nga nanawagan sila og back-up gikan sa mga silingan nga fire station.
Nitabang na sab ang mga residente sa pagpakgang sa kalayo.
Samtang mibiya na lamang ang ubang residente bitbit ang ilang mga kahimanan samtang walay mabuhat nga nagtan-aw gikan sa layo sa nasunog nga mga panimalay nga ginama sa light materials.
Alas-5 sa buntag nga na-under control kini sa mga kabumberuhan apan wala pa gidekara nga fire out ug gilusad na sab ang hauling operations.
Gituohang electrical short circuit ang rason sa maong sunog.
Gisusi pa sa BFP ang danyos sa mga kabtangan nga naugdaw sa dakong sunog samtang lauman sab ang hinanaling tabang nga ihatag sa CSWDO alang sa mga apektadong residente nga gipahikling na karon sa covered court sa Agdao ning dakbayan.
