DAVAO CITY – Gisubay na karon sa probinsiya sa Davao de Oro ang mga posibleng tubagon sa usa ka pribadong tulonghaan sa munisipalidad sa Maco kalabot sa mga estudyante kalakip na ang mga minor de edad nga na-stranded sa maong tulonghaan sulod na sa halos duruha ka bulan samtang gipatuman sa lalawigan ang enhanced community quarantine.
Sumala pa kang Davao de Oro Governor Jayvee Tyron Uy, giimbestigahan na nila karon ang report kalabot sa mga nangatanggong nga mga estudyante sulod sa pribadong tulonghaan.
Gitataw sab opisyal nga sukad Marso 16, tanan nga klase sa lalawigan ang suspendido na kalakip ang mga aktibidad sulod sa tulonghaan ang hugtanon na sab nga gidili ilalom sa Provincial Executive Orders 23, 25, ug 28 ingon man sa Omnibus Community Quarantine Guidelines sa Inter-agency Task Force.
Sa kasamtangan, gisugdan na ang pagpauli sa mga estudyante sa ilang pamilya apan kinahanglan nga mopailalom ang mga nahisgutan sa 14-day community quarantine sa pasilidad nga gi-aprubahan sa Provincial Health Office.
Nasayran nga ang kapin 90 ka mga estudyante ang naghulat sa ilang graduation, apan tungod sa lockdown, wala na kini nakauli sa ilang panimalay.
Giimbestigahan na sab karon sa DepEd sa Davao de Oro ang maong tulonghaan sanglit padayon sumala pa kini nga nagapahigayon gu school activities ug summer classes bisan nga temporaryo una kini nga gipahunong.
