Kapin pito ka milyon ka mga deboto ang misalmot sa Pista sa Señor Jesus Nazareno hangtod kaganihang buntag, sumala sa Manila City government.
Sa usa ka pahayag sa ilahang Public Information Office, gipahibalo sa dakbayan sa Manila nga mokabat na sa 7,337,700 ka mga partisipante ang natala alas-7 sa buntag adlaw nga Sabado.
Matod pa, ang maong ihap usa ka crowd estimate sa “accumulated grand total” nga nakuha gamit ang drone technology sa Innovation Integrated GIS and Data Hub sa Manila Disaster Risk Reduction and Management Office (MDRRMO).
Sumala pa ang Traslacion karong tuiga mao ang tradisyunal nga prosisyon sa hulagway sa Jesus Nazareno nga matag tuig ginadagsa sa minilyon nga deboto nga miabot na og dul-an 30 ka oras.
Subay sa livestream video alas-9:50 sa buntag, ang karwahe sa Jesus Nazareno anaa na sa Quinta Market area samtang padulong sa Quiapo Church, ang pinuy-anan niini.
Sa pamahayag ni NCRPO spokesperson Police Major Hazel Asilo nga alas-5 sa buntag, ang kinatibuk-ang crowd estimate mikabat na sa 1.4 ka milyon, samtang mga 160,000 ka mga tawo ang nagtigom sa Quiapo Church.
Samtang, duha ka mga deboto sa Jesus Nazareno ang nakabsan atol sa Traslacion karong tuiga sumala sa National Capital Region Police Office (NCRPO).
Apan subay sa gipagawas nga pamahayag sa pamunuan sa Quiapo Church, wala nila giisip nga kabahin sa traslacion ang kamatayon sa usa ka photojournalist nga nakabsan sa kinabuhi kagahapong adlawa samtang nag-coverage sa prosisyon.
