DAVAO CITY – Aron nga masigurong wala nagdala ug sakit ang mga 400 ka mga exotic animals nga una ng gipayuhot sa Mati City, gipailalom kini sa Department of Environment and Natural Resources (DENR) sa quarantine.
Kahinumduman nga sa nahisgutan nga ihap, 28 niini ang namatay apan nagtuo ang ahensiya nga posibleng na-dehydrate o gigutom kini ilabi na nga lahi na sumala pa ang naandan nga mga gipangkaon niini sa Indonesia kung itandi dinhi sa Pilipinas.
Una ng gibutyag ni Dr. Rogelio Demelletes Jr. sa DENR nga dugay ang pagwalig sa nahisgutan nga hayop sa baybayon nga maoy hinungdan nga nagkulang ang ilang mga pagkaon ug posibleng ang uban niini ang nabasa sa dagat samtang anaa sa ilang paglawig.
Gisubay karon sa ahensiya kung adunay airborne diseases ang langgam ug kung positibo ang mga nahisgutan, kinahanglan gilayon kini nga patyon aron ng malikayan ang dakong kadaot nga ihatud niini.
