Ginalauman sa National Commission of Senior Citizens (NCSC)-Davao Region nga makaproseso na ug makapagawas og cash benefits ngadto sa 3,515 seniors lakip niini ang octogenarians ug nonagenarians, ug ang 29 ka centenarians sa rehiyon sa unang kuwarter sa 2025.
Gikanayon ni NCSC-Davao Region Commissioner, Ida Yap-Patron, nga kini nga mga potensiyal nga benepisyaryo mamahimong magtimaan sa ilang talagsaon nga pang-edaron, nga anaa sa Enero, Pebrero, ug Marso karong tuiga.
Ilawom sa Expanded Centenarian Act o Republic Act (RA) No. 11982, ang mga seniors nga miabot na og edad nga 80, 85, 90 ug 95 makadawat og P10,000 cash gift matag usa.
Subay kini sa giamendahan nga RA 10868, nga maghatag og P100,000 cash gift alang usab sa 100 anyos.
Uban ang hingpit nga implementasyon sa Expanded Centenarian Act sugod karong tuiga, siyam ka mga centenarians ug 1,269 octogenarians ug nonagenarians, kansa nagsaulog sa ilang mga adlaw’ng natawhan niadtong Enero, mao’y una nga makabenepisyo gikan sa cash grants sa rehiyon.
Gibutyag usab ni Yap-Patron, nga ang cash benefits iapud-apod ngadto sa pito ka mga centenarians, ug 967 octogenarians ug nonagenarians kansa magsaulog sa ilang adlaw’ng natawhan karong Pebrero.
Pag-abot usab sumala pa sa Marso, 13 usab ka centenarians ug 1,279 octogenarians ug nonagenarians ang gilauman nga makabenepisyo gikan sa cash grants.
Dugang pa ni Yap-Patron, nga ang listahan sa mga benepisyaryo nag-gikan sa mga buhatan sa Local Social Welfare and Development sa rehiyon.
Apan, gipaklaro niini nga ang mga benepisyaryo kinahanglan pa gihapon nga motuman sa gikinahanglan nga rekisito susama sa application form, primary ID, photo ID, ug endorsement gikan sa local chief executive, ug isumite ngadto sa LSWDO ug sa Office of Senior Citizens Affairs (Osca).
Makuha ang application form gikan sa NCSC website, NCSC offices, LSWDO, Osca, o sa barangay hall pinaagi sa senior citizens association.
Dugang pa niini nga ang NCSC central office maoy mohimo sa “final assessment and validation”, ug mag-download sa badyet ngadto sa regional office alang sa payout sa mga benepisyaryo.
