Mokabat sa P3,229,864 nga iligal nga droga kon shabu ang nakumpiska sa otoridad sa AFP-PNP Border Control Point sa Barangay Lacson, Calinan District ning dakbayan pasado alas-12:00 ang takna kagahapon sa udto.
Subay sa report, nakita sumala pa sa mga personahe sa Task Force Davao ang mga kontrabando samtang niagi sa checkpoint ang duha ka mga suspetsado nga sakay sa Nissan Navarra.
Giila ang mga dinakpan nga sila Ronnie Rey Sumo Domingo, 38, nga taga-Maramag, Bukidnon ug Jeam Gulapo Cagalawan, 29, na taga-Balingasag, Misamis Oriental nga mibyahe pasulod dinhi sa dakbayan sa Davao.
Mokabat usab sa 474.98 gramos sa iligal nga droga ang gikustudiya na sa mga otoridad karong panahuna.
Nagpasalamat usab si Colonel Rodrigo Mariñas Jr., Commander sa Task Force Davao, ngadto sa mga personahe sa TFD uban ang Davao City Police Office sa gihimong pag-igmat sa matag checkpoint area sa dakbayan.
