DAVAO CITY – Gikumpirma sa Sta. Ana Police nga napahamtangan na og multa ang 273 ka mga indibidwal nga nagmalapason sa ginapatuman nga liquor ban sa Davao City.
Sumala ni Police Capt. Rizalito Clapiz, Officer-in-Charge sa Sta. Ana Police Station, atol sa ekklusibong pakighinabi sa Bombo Radyo Davao, gimanduan ang mga dinakpan na bayaran ang nasa P3,000 nga multa hangtud Miyerkules.
Kasamtangang nasa 10% pa lamang sa mga nadakpang indibidwal ang nakabayad na sa gipahamtangang multa.
Asikasuhon sab sa Business Bureau ang pag-imbargo sa business permit sa mga bars sa may dalang Jacinto St., cor Padre Faura St., ug sa Narra St., corner Fatima St., nga nasutang nagbaligya og mga ilimnong makahubog taliwala sa oras sa liquor ban sa dakbayan.
Gikabutyag sab sa kapulisan nga anaa sa 18 hangtud 35 anyos ang pangidaron sa mga nadakpang indibidwal atol sa 2 ka adlaw nga liquor ban operation sa Sta. Ana Police Station niadtong nakalabayng weekend.
Subling nagpahinundum ang kapulisan sa oras sa liquor ban sa dakbayan gikan ala-1 sa kaadlawon hangtud alas-8 sa buntag, subay sab sa City Ordinance 004-13 series of 2013, diin hugot nga ginabawalan ang pagbaligya og bisan unsang ilimnong makahubog.
via || Bombo LJF
