DAVAO CITY – Mikabat sa 180,000 ka out-of-school youth (OSY) sa Mindanao, lakip ang Davao City, ang target nga benepisyaryo sa lima ka tuig nga programa sa U. S. Agency for International Development (USAID). Gawas sa Davao City, ang Opportunity 2.0 Program Davao Hub gilangkuban sa mga siyudad sa Cagayan de Oro, Iligan, Cotabato, ug General Santos. Gibutyag sa team leader nga si Rone Dela Cruz nga ang programa nagpunting sa 15 hangtod 24-anyos nga OSY nga mahatagan og husto nga mga oportunidad sa pagkat-on gumikan ang mga kini mamahimong trabahante sa nasud sa umaabot nga panahon. Dugang usab ni ini nga importante ang paghatag og access sa edukasyon ug mga oportunidad nga makahuman ang OSY og at least junior high school o senior high school pinaagi sa Alternative Learning System sa Department of Education. Samtang, sa pikas bahin, gimugna sa Davao City ang Davao City Alliance for Out-of-School Youth Development Council (DCAOSYDC) pinaagi sa Executive Order 72 nga gipirmahan ni Mayor Sebastian Duterte niadtong Disyembre, kung diin, importante matod pa ang konseho gumikan kini ang mag prioritize sa mga aksyon nga maghatag og development initiatives alang sa OSY ug maghatag ug klaro nga action plan nga nahiuyon sa Opportunity 2.0 program alang sa sunod nga duha ug tunga ka tuig.
