DAVAO CITY – Gibutyag sa Department of Social Welfare and Development (DSWD) Davao Region nga mukabat sa 13,961 ka mga benepisiyaryo sa Pantawid Pamilyang Pilipino Program (4Ps) kaniadtong 2017 ang gitangtang sa listahan human nga pakyas kini sa pagtuman sa pipila ka mga kondisyon.
Matud pa kang DSWD-Davao public information officer Carmela Duron, aduna pa gihapoy mga pamilya nga nagdawatan ug regular income, pipila ang nahatagan ug sayop nga mga impormasyon ug adunay misangla sa ilang mga cash cards ug uban pa.
Daghanan sab sumala pa ang wala mitambong sa mga aktibidad nga kabahin sa programa sa ahensiya.
Sa 13,961 ka mga gipangtangtang sa listahan, 231 ang Grievance Redress System (GRS) ineligibility, 11,693 ang walay eligible for the Compliance Verification System, 352 ang adunay regular income, 356 ang uban nga concerns, 147 sa fraud ug 1,182 ang waived.
Sa tuig 2017, nakatala ang rehiyon ug 231,864 Pantawid household nga adunay cash grants ilalom sa regular Conditional Cash Transfer (CCT) ug 29,065 ilalom sa modified CCT.
Ang 4Ps usa ka human development program nga mohatag ug conditional cash support ngadto sa mga pamilya nga adunay mga anak nga dili mosabra sa 18 anyos ug mo-comply sa pipila ka mga kondisyon sama na lamang sa pagpa-eskwela sa mga anak, pagpabilin nga himsog ang panglawas ug motambong ang mga ginikanan niini sa binulan nga Family Development Session sa ahensiya.
