Gipahawa ang kapin 10,000 ka mga residente human mibuto ang usa ka dakong wildfire sa habagatang bahin sa France, duol sa utlanan sa Spain. Sumala pa, sa pagkakaron, wala pa gihapon makontrol sa mga otoridad ang maong sunog nga nakalamoy na sa dul-an 4,600 ka ektarya sa kalasangan sa tiilan sa French Pyrenees. Dugang pa, miabot na sa 16 ka tawo ang naangol, lakip na ang upat ka bombero nga naapil sa operasyon batok sa sunog.
Sumala pa sa mga opisyal, gilauman nga mas mokusog pa ang pagkaylap sa kalayo sa mosunod nga mga oras tungod sa grabeng kainit, uga nga panahon, ug kusog nga hangin. Tungod niini, nagpadala na ang European Union og upat ka water-bombing aircraft gikan sa Cyprus ug Sweden, lakip ang kapin 100 ka mga bombero, aron motabang sa emergency response team nga naglihok sa lungsod sa Trevillach, duol sa Perpignan.
Lakip sa naapektuhan sa maong wildfire ang Tour de France, diin gipasira sa publiko ang usa ka bahin sa ruta aron hatagan og prayoridad ang operasyon sa mga bombero ug malikayan ang dugang peligro. Samtang, gipadayag ni European Commission President Ursula von der Leyen nga nagkahiusa ang European Union sa pagsuporta sa France atol sa pag-atubang niini sa maong dakong kalamidad.
Kahinumduman, matod pa sa mga eksperto, ang grabeng kainit nga nasinati sa France ug ubang mga nasud sa Europe sa milabay’ng mga bulan maoy hinungdan sa pagkauga sa dagkong kalasangan ug kayutaan, nga nakapasayon sa paspas nga pagkaylap sa mga wildfire. Sa kasamtangan, gilauman nga mosaka pag-usab sa hangtod 40 degrees Celsius ang temperatura sa habagatan-kasadpang bahin sa France ning semanaha, samtang padayon usab nga giatubang sa Spain ug Portugal ang grabeng heatwave.
