DAVAO CITY – Mukabat sa kapin Php 100 Milyon kantidad sa smuggled nga sigarilyo ang nasakmit sa Bureau of Customs (BOC-DAVAO) sa tuig 2022.
Kini sumala sa District Collector Sa BOC Port Davao nga si Erastus Sandino Austria, sumala kaniya ang bihatan nakipag-alayon sa ubang ahensya sa gobyerno sama sa Philippine coast guard, Armed forces of the Philippines , Philippine Navy, Philippine National Police, CIDG, PNP-Maritime Unit ingon man ang Philippine Drug Enforcement Agency (PDEA) ang lakip sa pagmonitor sa mga smuggled items ug mga ilegal nga droga nga musulod sa mga utlanan dinhi sa Pilipinas partikular na sa Area of responsibility.
Gumikan sa pakighiusa sa nagkalain-laing ahensya sa gobyerno,positibong nasakmit sa awtoridad ang smuggled nga mga sigarilyo nga misulod sa area of responsibility pinaagi sa land conveyance gikan sa lain-laing dapit sa Mindanao nga mas haduol sa ubang ASEAN Countries sama sa Malaysia ug Indonesia. Gumikan niini, mas gipakusgan sa BOC ang ilang lakang sa pagsakmit sa mga smuggled items pinaagi sa pakig-alayon sa ubang ahensya.
Gikanayon usab ni Austria nga ang nasakmit nga mga smuggled nga sigarilyo ilaha kining bas-on ug eh bulldoze aron ilabay tarong sa mga land-mills aron dili usab mahimong hinungdan sa polusyon.
Giangkon usab ni Austria nga nakasinati usab sila og kalisod sa paghika sa mga smugglers sanglit mas gipakusgan sa ahensya ang case build up inay intel build up aron masuta matud pa nila ang mga nagpaluyo sa smuggling.
Gawas niini, mihangyo usab si Austria sa kooperasyon sa tanan lakip na ang mga LGUs alang sa pagsumpo sa smuggling dinhi sa Rehiyon XI.
