Tingkagol sa prisohan ang usa ka babae nga ika-tulo sa listahan sa tigpayuhot og iligal nga droga sa rehiyon atol sa pagsilbi sa search warrant.
Sumala pa sa mga otoridad nga giisip nga regional high value individual ang dinakpan nga nakuhaan og nagkadaiyang pakete sa shabu nga mukabat og kapin usa ka milyon.
Lakip usab sa nakumpiska ang usa ka .38 nga revolber nga adunay mga bala.
Subay sa taho sa Davao City Police Office, naila ang suspetsado nga si alyas Am-am, 31-anyos, residente sa Bago Uma, Menterbro, Brgy Ilang, ning dakbayan sa Davao.
Sa kinatibuk-an mokabat sa P1,040,400 ang kantidad sa street value sa gituohang ilegal nga droga kon shabu.
Sa impormasyon sa mga otoridad, nadakpan ang nahisgutan sa iyahang pinuy-anan pasado alas Tres kagahapon sa hapon human nga ang korte nagpaguwa og kamanduan pinaagi sa search warrant sa iyahang pinuy-anan.
Sumala pa sa kapulisan nga narekober ang mga pakete sa usa ka coin purse color maroon ug usa ka sling bag nga color brown.
Samtang sa laing bahin, padayon usab nga ginaawhag sa kapulisan ang komunidad ug publiko nga mudangop gilayon sa ilahang buhatan kon ugaling dunay namatikdang nalambigit sa pagpahuyot og ilegal nga droga.
