DAVAO CITY – Human sa subling pag-abri sa Roxas Night Market kaniadtong Marso karong tuiga, gitaho nga muabot na sa kapin usa ka milyon pesos ang nahimong halin sa lokal nga kagamhanan sa syudad sukad mibalik ang operasyon niini.
Gikanayon sa City Economic Enterprise operations assistant Dereck Cainglet Jr., anaa sa kinatibukang Php 1,054,390 ang nakolekta gikan sa 258 vendors , lakip niini ang food section, accessories, ready to wear , ug massage.
Mukabat sab sa Php 3,100 ang abang nga matag bulan sa food vendors, samtang ang bahin sa RTW ug accessories section anaa sa 70 pesos matag adlaw o P 2,170 ang matag bulan nga abang niini. Php 20 sab matag adlaw sa massage section o P620 ang matag bulan nga abang niini.
Gilauman nga adunay reshuffling alang sa mga mamaligyaay sa Roxas Night Mark aron hatagan og kahigayonan ang uban pa na mu-operate sa ilang business.
Sa kasamtangan, wala pa miingon ang board kon kinahanglan ba madungagan ang mga stalls tungod sa padayong pagpatuman sa health and safety protocols sa mga vendors ingon usab ang mga kustomers .
