DAVAO REGION- Mokabat sa kapin P1.53 bilyon ang nakolekta sa Land Transportation Office (LTO)-XI nga kantidad sa multa, gikan sa mga traffic violators niadtong tuig 2024.
Sumala sa datos nga gipadayag ni Yuri Lim, ang hepe sa Law Enforcement Service sa LTO-XI, nahatagan og multa ang 55,014 sa kinatibuk-an nga 58,111 ka apprehension cases nga natala sa buhatan.
Sa maong mga kaso, nag una ang paglapas sa dili paggamit og seatbelt nga adunay 9,291 ka insidente, gisundan sa wala pag-gamit og helmet nga may 8,673 ka kaso.
Gibutyag usab ni LTO-XI Regional Director Atty. Ernesto Raphael Robillo nga daghan gihapon ang mga sakyanan nga wala marehistro, lakip na ang 60% ngadto sa 70% sa rehiyon, partikular na ang mga motorsiklo.
Natala sab ang 13 ka kaso sa kolorum nga mga sakyanan.
Giklaro usab ni Lim, nga sa matag caravan nga ginalusad sa tibuok Davao region adunay student permit issuances, registration of vehicles and motorcycles ingon man renewal of driver’s license.Nagpaabot ang LTO-XI nga ang maong mga programa makatabang sa pagkunhod sa mga dili rehistrado nga sakyanan karong 2025.
