Nagtuo ang kanhi Judge sa International Criminal Court (ICC) nga si Raul Pangalangan nga igo na ang ebidensiyang gipresentar sa prosecution aron magkombikto kang kanhi Pangulong Rodrigo Duterte.
Sumala sa kanhi hukom nga nagsilbi usab kaniadto isip dean sa University of the Philippines College of Law, lig-on ang mga ebidensiyang gipresentar sa unang adlaw sa hearing ug igo na sumala pa kini, aron makumbinsi ang mga hukom sa ICC.
Sa wala pa magsugod ang pagdungog, naglaum kini nga ipresenta sa panel ang ilahang witness aron ipakita ang merito sa kaso.
Apan inay nga magpatawag og saksi, usa-usa nga gihisgutan sa mga prosecutor ang pipila ka “specific details” sa mga kasong giakusa batok kang Duterte, lakip na ang mga video clips nga nagpakita sa mga kontrobersyal niining pahayag kaniadto.
Wala usab gisalikway sa kanhi ICC judge ang posibilidad nga gitigom pa sa panel ang ilahang “strongest evidence” alang sa trial proper, kon pananglitan molahos ang kaso gikan sa confirmation stage.
Lakip sa mga gipresenta sa unang adlaw sa confirmation hearing ang mga video sa kanhi pangulo diin giingong miangkon siya sa pipila ka pagpamatay ug sa ubang kontrobersyal nga mga kamanduan atol sa kampanya batok sa ilegal nga droga.
Sa pahayag usab ni senior trial lawyer sa Office of the Prosecutor nga si Julian Nicholls atol sa pagdungog, iyahang gibutyag nga lig-on ang ebidensiya nga anaa sa prosecution ug kaya sumala pa sa panel nga makakombikto sa kanhi pangulo, kon magdesisyon lamang ang mga hukom nga ipadayon kini ngadto sa full trial.
