DAVAO CITY – Gihaya na ang patay’ng lawas sa usa ka kanhi sakop sa militar nga napatay atol sa gilusad nga drug buy bust operation sa kapulisan sa Compostela Valley Province.
Gilusad ang operasyon sa Purok 9, Barangay Poblacion, Nabunturan, Compostela Valley Province sa mga sakop sa PDEA, inabagan sa CIDG, Nabunturan Municipal Police Station, ug hingtungdang mga ahensiya.
Kahinumduman nga patay ang suspek nga si Daz Montefolca/Jeffrey Montefolca alyas Daks, 42 anyos, kanhi miyembro sa Philippine Army sa dihang misulay pagsukol pinaagi sa pagbunlot sa iyang .38 revolver hinugndan nga napugos usab ang kapulisan pagpusil kaniya.
Gidala pa ang suspect sa Nabunturan Doctor’s Hospital apan gideklara kining dead on arrival.
Narekober sa kapulisan ang unom ka mga pakete sa ginadili nga droga nga adunay street value nga P 180,000.00, drug paraphernalia ug .38 revolver.
Samtang gipasakaan na usab ug kaso ang lain pang usaka kaubanan niini nga nailang si Nolaizah Lumiguez nga nadakpan atol usab sa maong buy bust operation.
