DAVAO CITY – Miduaw si kanhing pangulong Rodrigo Roa Duterte sa haya sa mipanaw nga Davao Oriental Governor Corazon N. Malanyaon sa Cosmopolitan Memorial Chapels ning dakbayan.
Kauban sa kanhing pangulo nga mibisita sa lamay ang iyang common law wife nga si Honeylet Avancena ug ilang anak.
Nasayran nga si Governor Malanyaon ug President Duterte ang dungan nga gituboy kaniadto ni kanhing President Corazon Aquino sa usa ka mamahinungdanong posisyon sa Davao City atol niadtong pag-establisar sa revolutionary government sa tuig 1986.
Si Gov. Malanyaon ang gitudlo isip OIC Councilor samtang si kang pangulong Duterte ang gipili nga OIC Vice Mayor.
Sa pakighinabi ngadto sa usa sa mga kabanay sa gobernador kabahin sa kamatayon sa 73-anyos nga gobernadora, ayha paman nahitabo, okupado sumala pa kini sa iyang mga gimbuhaton ilabi pa niadtong adlawa aduna siya’y gitambungan nga kalihukan nga maoy hinungdan nga naapektuhan ang iyang kasing-kasing.
Samtang sa laing bahin, gikatakda nga i-byahe ang patay nga lawas sa gobernador sa Provincial Capitol sa dakbayan sa Mati karong adlaw nga Dominggo alang sa duha ka adlaw nga lamay, ug sundan kini sa pagbyahe sa iyang yutang natawhan sa minisipalidad sa Cateel alang sa public viewing ayha kini ibalik sa dakbayan sa Dabaw alang sa gikatakdang lubong alang sa mipanaw nga gobernador sa probinsya sa Davao Oriental.
