DAVAO CITY – Daw napasagdan sumala pa sa kanhi mga opisyal sa National Telecommunications Commission (NTC) ang broadcast industry hinungdan nga midaghan ang mga radio station nga illegal nga nag-operate sa rehiyon.
Kini ang nahimong reaksiyon ni NTC XI Regional Director Nelson Cañete labot sa iyang nadiskobrehan nga sobra ka daghang mga radio stations nga nag-tingog apan wala maghupot ug tukmang mga dokumento, sama na lamang sa permit to operate ug daghan pang uban.
Sa pakighinabi sa Bombo Radyo Davao, gikanayon ni Cañete, sukad siya milingkod sa iyang posisyon niadtong milabay nga tuig 4 ka mga cease and desist order (CDO) na ang gipagawas sa NTC central office batok sa mga radio stations sa rehiyon nga illegal nga nag-operate.
Duha niin naa sa Digos City, ug tag-usa sa Bansalan sa Davao del Sur ug Lupon sa Davao Oriental.
Na-una nang gibutyag sa opisyal nga dul-an 30 ka mga radio stations sa rehiyon ang gi-rekomenda sa NTC nga pa-serhan gumikan sa violation sa communications and broadcasting laws.
Gitin-aw usab ni Cañete nga dili ang pagkutlo sa freedom of the press o freedom of expression ang ilang tumong kung dili buot lamang nila protektahan ang katungod sa mga radio stations nga legal nga nag-operate.
Gi-angkon usab niini nga nalisdan sila sa pagpatuman sa balaod sa NTC gumikan kay kadaghanan sa mga radio stations nga illegal nga nag-operate padayong nagdumili sa pag-cooperate ngadto kanila. Kung dili sumala pa sila pasudlon sa estasyon, walay tawo nga mo-atubang sa matag higayon nga mohimo sila ug inspection.
