DAVAO CITY – Gibadlong sa Regional Trial Court (RTC) Branch 15 si kanhi Mindanao Development Authority Chair Maria Belen Acosta ug ang iyang abogado, si Israelito Torreon, tungod sa pag-angkon nga gibalibaran ang pag-dismiss sa iyang quo warranto petition.
Nasayran nga nag-isyu og “Show Cause Order” si Presiding Judge Mario C. Duaves nila ni Acosta ug Torreon ug nagmando kanila sa pagsumiter og written explanation ubos sa oath ug show cause nganong dili sila ma-cited in contempt sulod sa 10 ka adlaw.
Gisaway sa huwes sa trial court ang pahayag ni Acosta, nga adunay dili husto nga mga kamatuoran nga nagdaot sa tinuod nga kinaiya ug unod sa mga mando ug proseso sa Korte.
Giangkon ni Acosta nga gibali sa trial court ang pagbasura sa iyang quo warranto petition batok kang Leo Tereso Magno, kinsa gitudlo isip MinDA chair sa miaging buwan ni Pangulong Ferdinand Marcos Jr. ug gi-dismiss kini sa trial court niadtong Mayo 27.
Giangkon usab ni Acosta nga gimanduan ang kampo ni Magno sa pagtubag sulod sa 15 ka adlaw.
Gitataw ni Acosta nga dili co-terminus ang iyang posisyon isip chairperson sa MinDA ni kanhi Presidente Rodrigo R. Duterte, kinsa nagtudlo kaniya.
Siya niingon nga ang Republic Act (R.A.) 9996, ang balaod nga nagmugna sa MinDA, nagtakda sa termino sa iyang chairperson sulod sa unom ka tuig gikan sa pagkatudlo ug mahimong tangtangon tungod lang sa hinungdan.
Gipahayag sab niini nga wala magpahibalo ang Malacañang kaniya bahin sa pagtudlo kang Magno ug wala gisunod ang “due process” tungod kay walay klarong “hinungdan” sa pagtangtang kaniya sa katungdanan.
Gimanduan ni Duaves si Acosta nga tangtangon ang mga pamahayag sa iyang social media ug online platforms ug ipatangtang kini sa tanang media outlets.
Nipasidaan ang korte nga ang dili pagsunod sa mga direktiba makapugong sa korte sa pagpahamtang og bug-at nga silot.
