DAVAO – Patay ang usa ka kanhing myembro sa Philippine Army human nga gipusil patay sa riding in tandem sulod sa iyang Sari-Sari store, pasado alas 9:00 ang takna kagabii sa Lakandula St. kanto Jerome Extention R.Castillo Agdao Dist. ning dakbayan sa Davao.
Naila ang biktima nga si Gerardo Sardan Katigbak, 36 anyos, minyo ug residente sa Mutual Homes Buhangin, ning dakbayan.
Sa gipahigayon nga imbistigasyon sa kapulisan nasayran nga ang biktima anaa sa sulod sa iyang tindahan niadtong higayuna kauban sa iyang live-in-partner ug ang ilang helper apan kalit na lamang nga misulod ang usa ka wala mailhi nga suspetsado nga naka full face helmet, nakasuot ug gray jacket ug naka-maong pants, ang midul-it ug pagpusil sa biktima sa makadaghang higayon tumong sa iyahang ulo nga maoy hinungdan sa iyahang hinanaling kamatayon.
Human sa maong panghitabo dali nga misibat ang suspek sakay sa usa ka motorcycle nga nagpaabot sa gawas ug nipadulong kini sa norte nga bahin sa lugar. Sumala sa mga nakasaksi dunay lain pang motor ang nag pondo sa unahan atol sa panghitabo, nga nagsilbing look out.
Narekober sa krime scene ang tulo ka basiyo sa bala sa .45 nga pistol. Sumala pa sa otoridad, nasayran nga ang biktima, una nang gi-ambush sa niadtong Hulyo sa miaging tuig. Apan nakalingkawas kini sa kamatayon ug sukad niadto sumala pa nakadawat na kini og bahad sa iyang kinabuhi.
Sa pagkakaraon nagpadayon pa gihapon ang imbestigasyon sa otoridad.
