Padayon karon ang gihimong imbistigasyon sa kapulisan kabahin sa nahitabong pagpamusil kagabii sa dakbayan sa Tagum. Subay sa report sa mga otoridad,gipusil sa wala mailhing mga suspek si Audrie Perez, 43-anyos, nga kandidato sa pagka-Board Member sa unang distrito sa probinsya sa Davao del Norte, sa Delfina Village, Barangay Magugpo North, dakbayan sa Tagum pasado alas Onse kagabii.
Subay pa sa gihimong imbistigasyon sa mga otoridad nagmaneho og motorsiklo ang biktima samtang pauli kini sa ilahang pinuy-anan apan kalit kining gipusil atubangan sa Mormons Chapel. Sumala pa sa mga nakasaksi sa maong panghitabo nga nga nadunggan ang sunod-sunod nga boto sa armas gikan sa armadong mga suspetsado. Sa crimescene narekober sa mga otoridad ang lima ka mga basyo sa bala nga iya sa kalibre.45 nga pistola.
Sa pagkakaron nagpadayon pa ang gihimong imbistigasyon sa mga otoridad aron masayran ang motibo sa pagpamusil ingon man ang mga nagapaluyo sa maong panghitabo. Samtang ang biktima nagpabilin pa sa ospital ug mipailawom na sa operasyon ug luwas na ang kahimtang sa biktima.
