Gipahimangnuan sa usa ka environmental group sa Davao City ang tanang lokal ug nasudnong kandidato nga kuhaon ug tarungon ang pagdumala sa ilang gipang-post nga campaign materials human sa 2025 midterm elections.
Matod ni Atty. Mark Peñalver, executive director sa Interfacing Development Interventions for Sustainability (Idis), dako ang gikatampo sa mga paraphernalia sa nagkadugang nga basura sa siyudad.
Subay sa Executive Order No. 6 nga gi-isyu ni Mayor Baste Duterte, gi-require ang tanang kandidato nga maghimo og mga team nga mo-retrieve, mag-recycle, ug magdisiplina sa ilang gipanggamit nga campaign materials.
Giingon pa nga kung pasagdan kini, posibleng maka-barado sa mga kanal ug dalan sa tubig, hinungdan sa pagbaha, labaw pa karong sigeg ulan.
Dugang pa, ang mga tarpaulin nga PVC base sa pagtuon sa EcoWaste Coalition, adunay mga kemikal nga makadaut sa kahimsog sa tawo ug kinaiyahan.
Kabahin niini, gipasabot usab ni Peñalver nga mas maayong magpakita og aktibong serbisyo ang mga kandidato sa ilang komunidad imbes nga magsalig lang sa daghang posters.
Busa gi-awhag ang tanang kandidato nga makigkoordinar sa Idis ug uban pang grupo nga nag-upcycle sa mga daang materyales, ug dad-on kini sa mga recycling centers aron malikayan ang pagsangko niini sa sanitary landfill.
