Gipadayag sa kampo sa nagtago karon nga si kanhi Ako Bicol Party-list Representative Zaldy Co nga maghimo sila og legal remedy sa hustong panahon batok sa arrest warrant nga gipagawas batok kaniya ug sa posible pang dugang kaso sa graft ug plunder nga gikonekta sa giingong korapsiyon sa mga flood control projects.
Sumala sa iyang abogado nga si Atty. Ruy Rondain, nagtuo sila nga sundon sa awtoridad ang regular nga proseso sa pagsilbi sa arrest warrant, busa mag-andam sila og legal nga pamaagi sa tukmang panahon.
Mikontra usab ang abogado sa rekomendasyon sa Department of Public Works and Highways (DPWH) nga magsumite og kaso sa plunder ug graft batok kang Co ug kanhing House Speaker Martin Romualdez samtang naghulat pa sila sa klarong pagberipika sa mga pasangil.
Kahinumduman nga niadtong Biyernes, gipahibalo ni Pangulong Ferdinand Marcos Jr. nga ang DPWH ug ang Independent Commission for Infrastructure (ICI) nagrekomendar sa pagpasaka ug kaso batok kang Co ug Romualdez tungod sa ilang posibleng kalambigitan sa anomaloso nga flood control projects.
