Gipasabot sa kampo ni kanhing Negros Oriental Representative Arnolfo “Arnie” Teves Jr. ang hinungdan sa wala niya pagduso og not guilty plea atol sa gihimong arraignment kagahapong adlawa.
Atol sa maong arraignment, mitubag si Teves pinaagi sa pag-ingon nga “I invoke my right to remain silent.”
Kini mao lamang ang iyahang tubag sa duha ka arraignment nga gihimo kagahapong adlawa sa Manila Regional Trial Court Branch 12.
Gumikan niini, ang korte na mismo ang mipasaka og not guilty plea alang kang Teves, subay sa gipatuman nga legal nga proseso ugaling ang akusado dili mopasaka og kaugalingong plea.
Gipasabot sab sa iyahang abogado nga si Atty. Ferdinand Topacio nga normal lamang kini ug ilaha na sumala pang daan nang gilauman.
Kini matud pa ang sumbanan nga pamaagi kung ang akusado wala mopadayag sa iyahang plea sa panahon sa pagbasa sa maong arraignment.
Dugang pa ni Topacio, ang pagtawag ni Teves sa iyahang katungod nga magpabiling magpakahilom usa ka taktika gumikan aduna matud pa silay mga isyu o pangutana nga buot mahatagan og klarong tubag.
Matud pa sa kampo ni Teves, nga nagapadayon gihapon ang ilahang baruganan nga aduna silay nakita nga mga iregularidad sa proseso sa pagpauli ni Teves gikan sa Timor-Leste pauli sa Pilipinas.
Sa laing bahin, adunay kalabotan sa consolidation sa mga kaso, gipadayag sa iyahang abogado nga giaprobahan na kini sa korte. Busa, ang duha ka kaso batok kang Teves mao ang illegal possession of explosives ug illegal possession of firearms, gihiusa na o consolidated na sa usa ka pagproseso.
