DAVAO CITY – Miapela ang kampo ni KOJC leader ug karong puganteng pastor nga si Apollo Quiboloy sa desisyon sa Korte Suprema nga ibalhin ang iyang child and sexual abuse cases gikan sa Davao City ngadto sa Quezon City.
Gikatarungan sa legal counsel sa kampo nga si Atty. Israelito Torreon, gihukman ang kaso base sa walay basehanan nga pag-angkon sa bias sa mga korte sa Davao City, nga malantaw nga usa ka pag-atake sa hudikatura.
Gipahayag usab niya nga wala pa sila makadungog bahin sa hukom, nga nakalapas sa husto nga proseso.
Niadtong Mayo 28, gitugot sa Korte Suprema ang hangyo sa Department of Justice nga ibalhin ang mga kaso ni Quiboloy gikan sa Davao City RTC ngadto sa Quezon City RTC.
Nakakaplag ang korte og lig-on nga mga rason aron hatagag katarungan ang pagbalhin, gumikan naglambigit ang mga kaso sa interes sa publiko ug ang akusado nga maimpluwensyahan sa lugar.
Hinuon, namatikdan usab ni Torreon nga mahimong usa ka pinansyal nga palas-anon ang maong kaso alang sa mga akusado ug uban pang mga hingtungdan nga partido.
Samtang mipahayag ang tigpamaba sa Korte Suprema nga si Camille Ting, mi-waive ang Office of the Court Administrator sa pipila ka mga kinahanglanon alang sa pagbalhin sa mga kaso tungod sa urgent nature sa maong hangyo ug ang kalabutan niini sa interes sa publiko.
Gidayeg ni Justice Secretary Jesus Crispin Remulla ang pag-apruba sa pagbalhin sa kaso ni Quiboloy, nga nagtawag niini nga dakong kalamposan sa ilang pagtinguha sa hustisya.
Niadtong Abril 3, niluwat og warrant of arrest ang korte sa Davao batok kang Quiboloy ug sa iyang mga kauban nga sila si Jackielyn Roy, Cresente Canada, Paulene Canada, Ingrid Canada, ug Sylvia Cemañes. Dugang pa, usa ka non-bailable qualified human trafficking nga kaso ang gipasaka sa korte sa Pasig City batok kanila.
