Nihangyo ang kampo ni kanhi Pang. Rodrigo Duterte sa International Criminal Court (ICC) Pre-Trial Chamber nga tanggalon ang usa pa ka doktor nga gitudlo aron mosusi sa kahimsog sa pangisip sa kanhing presidente sa dili pa magsugod ang pagtaral sa kaso.
Sa usa ka 18-nga panid nga submission nga gipirmahan sa abogado nga si Nicholas Kaufman, giinsistir niini nga kulang matud pa og kasinatian ang bag-ong doktor ug adunay mga “makalagot” kuno nga mga post sa social media nga nagpakita sa kakulang sa propesyonalismo.
Gihangyo sa kampo ni Duterte nga bawi-on gilayon ang kamanduan sa maong doktor sa dili pa siya makakuha og access sa mga pribadong impormasyon medikal sa kanhing Presidente.
Niadtong Septyembre, una nang gikuha sa depensa ang usa ka babayeng neuropsychologist gikan sa susama nga panel.
Samtang, giingon sa representante sa mga biktima sa war on drugs nga aduna kunoy igong mga kredensyal ang mga eksperto nga ilahang gisugyot alang sa pag-assess kang Duterte, nga karon kasamtangang napriso sa Hague Penitentiary Institution.
Si Duterte karon nag-atubang sa mga kaso nga may kalabotan sa 49 ka insidente sa pagpatay ubos sa iyang kampanya kontra iligal nga droga.
