Gipangayo sa kampo sa kanhing Presidente Rodrigo Duterte sa International Criminal Court (ICC) nga mag-andam og independent medical report aron mapamatud-an nga wala na siya’y pisikal o kognitibong kapasidad nga makalikay o makababag sa hustisya.
Sumala sa mosyon nga gi-file niadtong Disyembre 19, gikanayon sa depensa nga nagkagrabe ang kahimtang sa panglawas ni Duterte, base sa report sa usa ka independent medical panel nga naghulagway kaniya nga “tigulang, luya, ug adunay pagkunhod sa timbang.”
Gipangayo sa depensa sa Pre-Trial Chamber nga maduan ang Medical Panel sa pagsusi kung ang kasamtangang kognitibong kondisyon ni Duterte nagtugot ba kaniya sa paglikay, pagpanghadlok sa mga testigo, o paghimo og krimen.
Gibutyag usab sa depensa nga wala pa gitugotan si Duterte nga moapil sa bisan unsang status conference sa korte, nga mahimong makatabang sa mga huwes sa pagtimbang-timbang sa iyang kondisyon.
Kini nga hangyo ang gi-file bisan pa sa unang assessment sa independent medical panel nga nagkanayon nga, bisan “hinay ug tigulang,” kaya gihapon ni Duterte nga motambong sa mga court proceedings kabahin sa mga kasong crimes against humanity sa panahon sa iyang war on drugs.
