DAVAO CITY – Subling gipakusgan karon sa Women and Children’s Protection Desk sa Davao City Police Office (DCPO) ang ilang kampanya alang sa pagprotekta sa mga bata.
Nag-unang tumong niini mao ang paghatag og pagtagad sa katungod sa mga kabatan-onan taliwala paman sa ilang pagkatao, pinuy-anan, relihiyon, panghuna-huna, hitsura, estado sa kinabuhi ug uban pa.
Kini tungod dako ang pagtuo sa WCPD-DCPO nga ang tanang bata ang adunay katungod nga trataron og sakto ug malayo sa pagpangabuso.
Subay niini, nanawagan na lamang ang maong buhatan ngadto sa publiko nga kung adunay makita, mahibaw-an o bisan mamatikdan mahitungod sa pagpang-abuso ilabi na sa mga kabatan-onan, mamahimong mangayo og tabang o i-report gilayon kini sa Davao City Anti Child Abuse Hotline o Kean Gabriel Hotline nga 09088184444.
Ang maong hotline ang abli 24/7 ilalom sa lokal nga panggamhanan sa syudad ug andam kanunay nga mualagad sa katawhan.
