DAVAO CITY – Gipahugtan pa karon sa City Health Office (CHO) ang ilang monitoring ingon man awareness campaign aron nga bungkagon ang mga breeding grounds sa mga lamok nga nagdala ug sakit nga Japanese Encephalitis virus.
Una ng gikumpirma sa CHO nga usa ka kaso sa maong balatian ang natala sa Barangay Malabog, Pacquibato District apan wala na nila nasayran kung asa na karon ang maong bata.
Hinuon gitino ni Dr. Josephine Villafuerte, CHO head nga natambalan ang maong bata ug kini sumala pa ang labing una nga kaso nga natala dinhi sa dakbayan karung tuiga.
Gikanayong ang Japanese Encephalitis (JEV) sama sab sa dengue, yellow fever ug Zika diin mamahimo sumala pa kini nga mapasa sa mga tawo piinaagi sa pagpaak sa lamok nga sagad mo-atake sa alas siete sa gabii hangtud alas alas tres sa kadlawon dili sama sa dengue nga sagad panahon sa kahaponon.
Nasayran sa record nga ang lain tulo pa ka kaso sa Japanese encephalitis nga natala sa rehiyon ang gilangkuban sa one-year-old nga babaye sa Barangay San Alfonso, Cateel, Davao Oriental kaniadtong Mayo 17; 5 anyos nga lalaki sa Barangay Poblacion, Compostela Valley kaniadtong May 10; ug onse anyos nga batang lalaki sa Poblacion Governor Generoso.
Apan ang mga nahisgutan ang susama nga natambalan. Nanawagan sab ang opisyal ngadto sa publiko o sa social media users nga dili magpataka sa pagpakatag ug impormasyon aron nga dili kini mohatud ug pag-panic ngadto sa katawhan.
