Gipalig-on sa House of Representatives ang bersyon sa Senado sa sugyot nga balaod nga magtugot sa temporaryong pagkunhod o pagsuspinde sa excise tax sa mga produktong petrolyo.
Tumong sa maong lakang nga maminusan ang epekto sa pagsaka sa presyo sa gasolina, diesel, ug uban pang nag-unang palaliton sa mga katawhan.
Sumala ni House Majority Leader Ferdinand Alexander “Sandro” Marcos, ang sugyot usa ka safety valve sa panahon sa krisis sama sa kasamtangang sitwasyon sa Tungang Sidlakan, nga nagdala og pagsaka sa presyo sa lana ug uban pang nag-unang panginahanglan.
Ilawom sa balaod, mahimo sa Presidente nga tanggalon hangtod P10 kada litro sa gasolina ug P6 sa diesel pinaagi sa temporaryo nga suspension o pagkunhod sa excise tax, ubos sa kondisyon.
Ang sugyot usab nagtakda og duha ka trigger: kung moabot sa $80 dollors kada barrel ang presyo sa Dubai crude oil sa miaging bulan, o kung ideklara sa Presidente ang national emergency o kalamidad nga nagdala og grabe nga pagsaka sa presyo sa petrolyo.
Ang bisa sa suspension o reduction molungtad og hangtod unom ka bulan gawas kung palugwayon sa Kongreso.
Sumala ni House Speaker Faustino “Bojie” Dy III, ang sugyot usa ka tubag sa nagpadayon nga krisis sa Middle East.
