Gibatikos sa Kamanggagawa Party-list Representative Eli San Fernando ang deklarasyon nga “walay pork” ang 2026 national budget, nga iyang gitawag og sayop ug makalimbongong pahayag sa publiko. Sa usa ka eksklusibong pakighinabi sa Bombo Radyo, mipadayon ang mambabatas sa pagpahayag nga nagpabilin ang pamaagi sa patronage sulod sa badyet, bisan pa sa opisyal nga pag-angkon nga limpyo kini gikan sa pork barrel.
Sumala kang San Fernando, daghan gihapon og alokasyon nga may discretionary nga kinaiya, mga pondo nga kontrolado sa mga politiko ug dali magamit base sa impluwensya. Giila niya nga apil niini ang lain-laing ayuda programs nga, bisan pa og adunay maayong tuyo, mahimong magamit isip instrumento sa pamulitika kung walay klaro ug istriktong giya sa pagpatuman.
Gipunting usab sa mambabatas nga kung ipundok ang kantidad sa maong mga programa, dako na kaayo ang masakop nga pondo nga dapat unta giusisa pag-ayo. Bisan wala siya mosupak sa tabang alang sa kabus ug nanginahanglan, iyang gipahimangnoan nga delikado ang kahimtangan kon ang pag-apod-apod anaa sa kamot sa pipila ka opisyal nga walay lig-on nga mekanismo sa accountability.
Sa laing bahin, iyang gikuestionar ang pipila ka unprogrammed allocations, lakip ang dugang pondo alang sa military modernization nga anaa na kuno’y kaparehong alokasyon sa laing pondo sa depensa. Matod pa niya, ang pagdoble sa pondo nagpakita sa kakulang sa klarong prayoridad ug hustong pagplano sa paggasto sa kwarta sa katawhan.
Gisaway usab ni San Fernando ang pagbasura sa ubang programa nga gilauman unta makahatag og trabaho ug kusog sa lokal nga industriya, ilabi na sa sektor sa manufacturing. Alang kaniya, sayang ang kahigayunan sa pagpalapad sa trabaho ug ekonomiya kon ang suporta sa gobyerno putlon.
Dugang pa, iyang giingon nga adunay mga alokasyon nga misulod sa badyet nga wala naagian og bug-os nga paghisgot sa lehislatura, ilabi na ang pipila ka proyekto nga giingong gisulod lang sa bicameral conference. Bisan pa niini, giila usab sa mambabatas ang positibong bahin sa 2026 budget, lakip ang mas bukas nga proseso sa bicam ug ang pagtaas sa pondo alang sa agrikultura ug edukasyon, mga sektor nga kritikal sa dugayng kalamboan sa nasud.
