Gipahayag sa World Health Organization (WHO) nga mipatay ang kainit sa panahon ug mosobra sa 175,000 ka tawo matag tuig sa Europa, gumikan kay paspas misaka ang temperatura kung ikumpara sa ubang bahin sa kalibutan.
Gikatala nga ang rehiyon sa Europa ang mitala ug 36% o sa average nga 175,000 sa nangamatay. Misaka ang temperatura sa Europa ug halos duha kahigayon sa average rate sa kalibutan.
Gilangkuban ang European region sa 53 ka mga nasud lakip na ang pipila ka nasud sa Central Asia. Dugang pa sa WHO, adunay 30% pagsaka sa heat related mortality sa Europe sa nakalabay nga duha ka dekada.
Ang sobrang kainit sa temperatura ang nagpagrabe sa mga sakit susama sa cardiovascular, respiratory ug cerebro-vascular, kahimtang sa panghuna-huna ug mga kondisyon nga adunay kalabutan sa diabetes.
Dugang pa niini nga ang grabeng kainit ang problema usab sa mga tigulang ug buntis nga kababaihan.
