Gipalawom karon sa Tagum City Police Station ang imbestigasyon sa pagpusil-patay sa Barangay Kagawad nga si Jorge Hinacay Josol Jr., 45-anyos, nga gipusil samtang sakay sa iyahang sakyanan sa Purok Pine Tree, Barangay Magugpo North, Tagum City, pasado ala 1:25 sa kaadlawon niadtong nakalabayng adlaw.
Sumala pa ni Police Lieutenant Colonel Wildemar Tiu, ang hepe sa Tagum City PNP, ginahimo na nila karon ang pag-review sa mga CCTV footage nga narekober aron masuta ang posibleng entry ug exit points sa suspetsado.
Naglusad na usab ang kapulisan og ballistic trajectory examination ug mga interview gikan sa kabanay sa biktima ug sa mga saksi sa insidente.
Sa paunang imbestigasyon, gitan-aw karon nga personal nga panagbangi ang posibleng motibo sa krimen, apan wala pa gisalikway ang posibilidad nga adunay laing rason o kasabot sa likod sa pagpamusil.
Subay sa report, samtang anaa pa sa sulod sa iyahang sakyanan, gipusil si Josol.
Nakagawas pa siya sa sakyanan ug misuway og pangayo og tabang apan nahulog lamang kini sa kanal.
Gumikan sa hilabihang samad pinusilan, miresulta kini sa iyahang hinanaling kamatayon. Narekober sa crime scene ang unom ka cartridge cases nga giingong gikan sa calibre .45 nga armas.
Gisaad sa kapulisan nga ilahang paningkamotan nga matunol ang hustisya sa pamilya sa biktima samtang nagpadayon ang ilang operasyon sa pag-ila ug pagdakop sa responsable sa maong krimen.
