Kadaghanan sa 63 ka mga incoming nga party-list representative ug 54 ka party-list group sa ika-20 nga Kongreso wala nagrepresentar sa marginalized ug underrepresented, kini sumala pa sa election watchdog nga Kontra Daya.
Matod ni Kontra Daya lead convenor Danilo Arao, base sa datos niadtong Pebrero 2025, 38 sa mga incoming party-list representative o 60.32% ang sakop sa mga political dynasty, adunay dagkong negosyo, o adunay koneksyon sa militar o kapulisan. Sa samang paagi, sa 54 ka party-list group nga giila sa Commission on Elections (Comelec) nga nakadaog sa party-list race, 32 niini ang giingong dili tinuod nga nagrepresentar sa marginalized ug underrepresented nga sektor, subay sa obserbasyon sa Kontra Daya.
Tungod niini, gibutyag sa lead convenor ang panginahanglanon nga adunay public pressure sa ika-20 nga Kongreso aron ipasaka ang anti-dynasty law ug amendahan ang party-list law aron masiguro nga tinuod nga representante sa marginalized ug underrepresented ang ilang mga representante. Gidugang usab niini nga ang mga adunahan ug gamhanan kinahanglan na nga mohunong sumala pa sa pag-hijack o pagkuha sa kontrol sa party-list system alang sa ilahang kaugalingong interes.
Sa laing bahin, gipasabot ni Comelec Chairman George Erwin Garcia nga subay sa desisyon sa Korte Suprema sa kaso nga Atong Paglaum vs Comelec, wala nagkinahanglan nga ang usa ka party-list representative gikan gayud sa marginalized nga sektor. Igo na sumala pa nga adunay adbokasiya alang kanila. Nagpasabot kini nga kinahanglan gayud og overhaul o dakong kausaban sa party-list law dinhi sa nasud.
