Mipanaw na kagahapong adlawa si kanhing Senate President Juan Ponce Enrile.
Si Enrile usa sa labing taas nga panahon nga nagsilbi sa gobyerno sa Pilipinas, nga adunay kapin sa pito ka dekada sa serbisyo publiko.
Ilado siya nga prominenteng legal ug political figure, nga nalakip sa mga makasaysayanong kalihukan sa nasud gikan sa Martial Law sa panahon ni kanhing Pang. Ferdinand E. Marcos Sr., hangtod sa EDSA People Power Revolution niadtong 1986 diin siya mitalikod sa rehimeng Marcos.
Nagsilbi siya isip Justice Secretary (1968–1970) ug Defense Minister (1972–1986) ug pipila ka higayon nga nahimong senador.
Niadtong 2008, napili siya nga Senate President ug miserbisyu hangtod 2013.
Bisan pa sa iyang pangidaron, nagpabilin siyang aktibo gihapon sa politika, ug ang kataposan nga nahimong posisyon niya mao ang Chief Presidential Legal Counsel sa administrasyong Bongbong Marcos.
Misulay usab siya sa pagdagan sa pagkapangulo sa nasud apan wala kini makadaog.
Sa iyang pagpanaw, natapos ang usa ka makulay ug kontrobersyal nga kapitulo sa kasaysayan sa politika sa Pilipinas.
Sa karon gipaabot pa ang opisyal nga pahayag gikan sa iyang pamilya ug sa gobyerno sa umaabot nga mga oras.
Una na nga gikumpirma sa anak niining babaye nga si Katrina Ponce Enrile nga kagahapon sa alas 4:21, nabugtu-an sa kinabuhi si Enrile samtang gi-alirungan sa iyahang mga mahal sa kinabuhi sa panimalay niini.
Nasayran nga gipagawas na sa ospital si Enrile subay na usab sa iyahang hangyo nga sa balay kini gusto nga mopahulay.
kahinumduman nga una na nga gibutyag ni Senador Jinggoy Estrada nga anaa sa ICU sa ospital ang kanhing Senate President tungod sa Pneumonia.
Nasayran nga nagpangidaron og 101 anyos ang naila sa tawag usab nga “Manong Johnyy” apan sumala usab sa anak niini nga si Jack Ponce Enrile nga kini nagpangidaron na og 103-anyos subay sa rekord sa Aglipayan Church sa Cagayan nga natawo niadtong 1922.
