Gipasidan-an ni retired Supreme Court Associate Justice Antonio Carpio ang gobyerno nga posibleng mahimong dakong lit-ag ang paglambo pag-usab sa joint oil and gas explorations tali sa Pilipinas ug China sa West Philippine Sea.
Gihimo ni Carpio ang maong pahayag atol sa iyang pagbisita sa Pag-asa Island.
Sumala sa kanhi mahistrado, ang pagsulod sa maong kasabutan nagpasabot sa pagdawat sa kondisyon sa Beijing nga sila ang nagnag-iya sa mga minirales sa giilugang teritoryo.
Ang pasidaan mitumaw human sa pahayag ni Pangulong Ferdinand Marcos Jr. nga abri siya sa pagpadayon pag-usab sa negosasyon uban sa Beijing alang sa joint energy project aron maseguro ang energy security sa nasud taliwala sa tensyon sa Middle East.
Sa bahin sa Department of Foreign Affairs (DFA), gipaklaro ni Secretary Maria Theresa Lazaro nga wala pay pormal nga kasabutan karon apan abri ang gobyerno sa posibilidad niini.
Gikumpirma usab ni Foreign Affairs Undersecretary for Policy Leo M. Herrera-Lim nga anaa pa sa exploratory stage ang panaghisgot ilawom sa 11th Bilateral Consultation Mechanism (BCM) sa Fujian, China. Sa laing bahin, gipahayag sa Chinese Embassy sa Maynila nga adunay positibong progreso ug lawom nga diskusyon ang duha ka nasud bahin niini.
Nagpabiling sensitibo ang isyu sa joint energy exploration tungod sa isyu sa soberanya.
Kahinumduman nga niadtong 2016, gibasura sa Permanent Court of Arbitration sa The Hague ang pag-angkon sa Beijing tungod kay wala kini legal nga basehan usa ka makasaysayanong desisyon nga wala gihapon giila sa China hangtod karong panahuna.
