Nagplano ang actress nga si Jillian Ward nga magpasaka og kaso batok sa mga nagpakatag og fake news batok kaniya.
Kini may kalabotan sa mga balita nga aduna siya’y sugar daddy, ug gilambigit pa siya kang kanhing Ilocos Sur Governor Chavit Singson.
Lakip na usab sa mga sayop nga akusasyon ang iyang pamilya diin gibutyag nga gibugaw siya ug nanginahanglan og kwarta gikan sa mga nahilambigit.
Gipahayag sa actress nga wala pa siya personal nga nakakita o nakasugat kang Singson.
Sumala sa iyang pamahayag, ang mga balita kabahin sa sugar daddy nigawas pagkahuman nga nakapalit siya og second-hand nga sports car sa edad nga 16.
Naapektuhan usab ang iyang career tungod niini, nga naghunahuna siya nga mohawa na lamang sa pag-artista.
Sa pagkakaron, gipaningkamotan pa niya nga masayran kung kinsa ang nagpakatag sa mga fake news batok kaniya.
