DAVAO CITY – Dili usa tugutan sa Jose Abad Santos LGU sa Davao Occidental ang pagpahigayon og mga religious activity ug uban pang mass gatherings tungod sa nasinatiang pagsaka sa mga kaso sa COVID-19 sa nahisgutang probinsya.
Giawhag ni JAS Mayor Jason John Joyce ang iyang mga constituent nga sa balay usa ipahigayon ang pag-ampo ug worship activities sanglit isirado usa ang mga simbahan ug mosque sa ilang lungsod.
Gawas pa niini, ginapatuman sa probinsya ang boundary lockdown matag Dominggo, diin walay tugutan nga makagawas ug makasulod sa ilang lungsod.
Gibuhat kini isip suporta na usab sa mga kasikbit nga lungsod sa Santa Maria ug Malita nga parehong nagapatuman og No Sunday Movement sa ilang dapit.
Essential travel lang ang tugutan matag weekdays, ug ginadiling mugawas ang mga menor de edad ug katigulangan.
Kung aduna may musulod sa JAS nga nanukad gawas sa Davao Region o di kaha gikan sa mga LGU sa rehiyon nga dunay taas nga mga kaso sa COVID-19, kinahanglan nila magpakita og negative RT-PCR test result.
Apan, kung walay mapakita nga swab result, ipailalom ang mga nahisgutan sa 14 ka adlaw nga quarantine.
