Nakasinati og talagsaong kusog nga pag-ulan ang eastern Japan nga miresulta sa lapad nga pagbaha ug landslide, diin unom ka tawo ang namatay samtang lima ang naangol.
Sumala pa sa mga awtoridad, lakip sa mga namatay ang usa ka babaye nga natanggong sulod sa iyang sakyanan human kini malumos sa baha sa dalan. Duha usab ka tawo ang nakuyapan sa dalan ug sa ulahi gideklarar nga patay.
Gipabakwit usab ang kapin 100,000 ka residente tungod sa padayon nga hulga sa landslide ug pagbaha. Dugang pa, kapin 20,000 ka panimalay ang nawagtangan og suplay sa kuryente, samtang mga 7,000 ka pasahero ang na-stranded tibuok gabii sa Narita Airport.
Natala usab sa Chiba, duol sa Tokyo, ang kapin 100 millimeters nga ulan kada oras sukad Huwebes sa hapon, nga kapin tulo ka pilo sa kasagarang rainfall karong Agosto.
Giisyuhan sa lokal nga mga awtoridad og Level 5 emergency warning ang pipila ka lugar niadtong Huwebes, apan gipaubos kini ngadto sa Level 4 niadtong Biyernes sa buntag.
Sa pagkakaron, nagpabilin ang pasidaan batok sa landslide ug pagbaha samtang gipaabot nga magpadayon ang kusog nga ulan hangtod Biyernes sa gabii.
Kahinumduman nga ang maong pagbaha misunod sa sunod-sunod nga mga bagyo nga nakaapekto sa Japan ug ubang silingang nasod karong semanaha.
