Gisugdan na sa Japan ang paghimo og mga pagtulon-an bahin sa mga posibilidad nga mamahimong mapuy-an ang Moon kon Buwan.
Nagkahiusa ang Kyoto University ug ang construction giant nga Kajima Corp, ug plano niini itukod ang usa ka lunar habitat nga mugamit og artificial gravity.
Ang “Neo Lunar Glass” nga proyekto nagtinguha nga maghimo og paraboloid structure nga makapahimo og Earth-like conditions pinaagi sa paggamit sa rotation aron makabuhat og gravity.
Ginalauman nga makumpleto ang ground-based prototype sa 2030.
Sumala pa ni Yosuke Yamashiki, professor sa advanced integrated studies in human survivability sa Kyoto University, nga ang proyekto nagkinahanglan og dakong teknolohikal nga lakang, apan naglaum kini nga makab-ot ug maghatag og dalan ang maong proyekto alang sa mga kolonya sa kalawakan.
Ang Lunar Glass nga structure anaay diameter nga 200 metro ug taas nga 400 metro nga makadawat og kapin 10,000 ka tawo.
Gilauman nga ilunsad ang proyekto sa kasamtangang fiscal year.
