Giangkon ni Police Staff Sergeant (PSSG) Arla Ray Paciencia, ang iyaang pulis ni alyas “Nash,” usa sa mga menor-de-edad nga suspek sa school shooting incident sa Tacloban City kaniadtong Hunyo 22, 2026, nga ilegal nga misulod sa iyang balay ang iyang pag-umangkon ug gikuha ang iyang pusil.
Kahinumdoman nga migawas sa imbestigasyon nga ang pusil sa pulis maoy gigamit sa pagpamusil sa San Jose National High School, nga misangpot sa kamatayon sa tulo ka kapwa estudyante ug nakaangol sa pipila pa. Atol sa pagtambong ni PSSG Paciencia sa hearing sa Senate Committee on Women, Children, Family Relations and Gender Equality kaniadtong Miyerkules, Hulyo 1, 2026 iyang giingong pugos nga misulod ang iyang pag-umangkon sa iyang balay sa wala pa mahitabo ang insidente.
Matod niya, gipugos usab ni Nash ang pag-abli sa naka-lock nga locker diin gibutang ang iyang pusil.Gipasabot ni Paciencia nga ang pusil gibutang sulod sa usa ka plastic locker nga naka-lock ug gisulod pa sa gun box, ug siya lamang ang adunay yawe sa balay ug sa maong sudlanan. Giangkon usab sa pulis nga dili standard safety vault ang iyang gigamit nga taguan sa pusil, apan nagtuo siya nga igo na ang seguridad niini tungod kay siya ra ang nagpuyo sa maong balay.
Sa pagkakaron, anaa sa kustodiya sa mga awtoridad sila alyas “Rod” ug “Nash” samtang gihulat ang ilang pagbalhin sa social welfare and development facility diin sila ipaubos sa intervention ug rehabilitation program.
