Gipadayag sa bag-ong gitudlo nga Ombudsman nga si Jesus Crispin ‘Boying’ Remulla nga iyang ablihan pag-usab ang isyu bahin sa confidential funds ni Bise Presidente Sara Duterte.
Matod ni bag-ong gitudlo nga Ombudsman Boying Remulla, pagatunan niya kini isip bag-ong opisyal sa maong buhatan.
Busa iyang pangitaon ug kontakon ang mga tawo nga may katungdanan nga nagkupot sa maong report o isyu nga gipadangat sa buhatan sa Ombudsman.
Kahinumduman nga gisumite sa House Committee on Good Governance ang ilang committee report ngadto sa Ombudsman batok sa ikaduhang pangulo (Vice President) may kalabotan sa giingong sayop nga paggamit sa pondo sa Department of Education.
Diin ilang girekomenda nga pasakaan og kaso si Bise Presidente Sara Duterte alang sa mga alegasyon sa technical malversation, perjury, bribery, ug plunder may kalambigitan sa kontrobersyal nga confidential funds.
Sumala pa niini, iyang gipadayag nga makasalig ang publiko nga siya magpakita og kasinatian (transparency) ug ipatuman ang pagpanubag (accountability).
Gisiguro niya nga sa iyang paglingkod isip Ombudsman, panagutan-on ang mga opisyal uban sa nagpadayon nga imbestigasyon kabahin sa anomalya sa mga flood control projects.
Busa gilauman nga sa paglingkod ni Remulla isip Ombudsman, ang buhatan mahimong abri ug prayoridad ang pagpangita og kasulbaran ug pagpanubag sa mga tawo nga nalambigit sa isyu sa korapsyon.
Si Jesus Crispin ‘Boying’ Remulla ang gitudlong bag-ong Ombudsman nga mopuli kang Samuel Martires nga nahuman ang iyang termino niadtong Hulyo ning tuiga.
Gikan sa pito ka nominadong aplikante sa shortlist sa Judicial and Bar Council, si Remulla ang napili ni Presidente Ferdinand ‘Bongbong’ Marcos Jr.
Bisan pa og aduna pa siyay pipila ka adlaw aron hunahunaon kung kinsa ang itudlong bag-ong Ombudsman human nga gisumite kaniya ang shortlist kagahapon, si Remulla ang iyang napili alang sa maong posisyon.
Sumala ni Ombudsman Boying Remulla, sa Biyernes siya opisyal nga molingkod sa bag-ong buhatan, apan sa Huwebes pa lamang mopanumpa na siya.
Samtang si Justice Undersecretary Fredderick Vida ang gitugyanan nga officer-in-charge sa Department of Justice.
Sumala ni Ombudsman Remulla, kini resulta sa ilang kasabutan ni Presidente Bongbong Marcos Jr. kagahapong adlawa.
