DAVAO CITY – Gikumpirma sa usa ka Israeli soldier nga nangandam na ang ilahang pwersa sa ilahang gyera tali Lebanon human sa gikatahong pagpanglabay kanila og mga dagkong armas pipila na ka simana ang nakalabay.
Sa ekklusibong pakighinabi sa Bombo Radyo Davao kang Shai Katzir, nga myembro sa militar sa Israel, giangkon niya nga kasamtangan silang ginatirhan sa grupong Hezbollah tulo ka beses sa usa ka adlaw.
Apan andam matud pa ang Israeli Forces nga mubalos ug maglusad og retaliation batok sa Lebanon aron puhagon ang maong pwersa.
Sumala pa ni Shai, dugay nang gibaharan sa United Nations nga muhawa na ang Hezbollah sa Lebanon apan human sa duha ka dekada nga pagmugna og kamanduan, nagpabilin gihapon sa pagpanghasi ang maong pwersa.
Giangkon sab niini nga dili mamahimong dali ang laumang gubat apan andam na ang pwersa ilabi pa nga anaa sa anaa sa kapin 100,000 ka mga Israeli soldiers ang gipapaandam alang sa all-out war.
Nasayran nga ang nagpadayon nga panagbangi tali sa militar sa Israel ug mga pwersa sa Hezbollah gikan sa Lebanon nagsumikad sa dugay nang tensiyon sa politika, teritoryo, ug relihiyon.
Ang Hezbollah, usa ka Shiite nga militanteng grupo ug partidong politikal nga nakabase sa Lebanon, nakig-away sa Israel sukad sa pagkatukod niini niadtong 1980s.
Gilantaw sa Israel ang Hezbollah isip usa ka dagkong hulga sa seguridad tungod sa halapad nga kapabilidad sa militar niini, lakip ang usa ka dako nga arsenal sa mga rocket ug mga missile nga makahimo sa pag-abot sa lawom nga teritoryo sa Israel.
Ang suod nga relasyon ni Hezbollah sa Iran nga usa sa mga nasud nga kaaway sa Israel, ang nagpasamot niini nga mga kabalaka.
Sa pikas bahin, gibutyag sab ni Shai nga duna nay ginalusad nga mga lihok protesta sa Israel batok sa pagpangatundanan ni Prime Minister Benjamin Netanyahu gumikan sa mga aksyon niini sukad nga niulbo ang gubat tali Hamas.
