Gikumpirma sa Israel nga tulo ka tawo ang napatay sa gihimong airstrike sa Iran batok sa Israel, human gipahibalo ni US President Donald Trump ang ceasefire tali sa duha ka nasud.
Una nang giingon ni Trump nga nagsugod ang ceasefire sulod sa 24 oras gikan alas-4:00 sa kaadlawon Greenwich Mean Time (GMT) o alas-12:00 sa udto, oras sa Pilipinas kagahapong adlawa, Hunyo 24.
Magsugod kuno ang Iran sa pagpahunong sa tanan nilang operasyon ug musunod ang Israel human sa 12 ka oras.
Bisan niini, gipahibalo sa Israeli army nga ilang gi-deactivate ang mga sirena sa northern Israel pipila ka minuto sa wala pa i-report sa Iran state media ang pag-abot sa sunod-sunod nga missile gikan sa Iran padulong sa Israel.
Nag-report usab ang Israeli emergency services og mga casualty tungod sa missile strikes nga gilusad sa Iran sa southern Israel, diin tulo ka tawo ang kumpirmadong namatay.
Base sa opisyal nga datos sa mga namatay sukad nagsugod ang panagbangi tali sa Israel ug Iran kaniadtong Hunyo 13 ning tuiga, kapin sa 400 katao ang namatay sa Iran samtang 24 ang kumpirmadong namatay sa Israel.
