Gikumpirma ni US President Donald Trump nga iyang gimanduan ang militar sa Estados Unidos nga maglusad og pag-atake batok sa Islamic State group nga anaa sa north-western Nigeria, kauban sa pagsaulog sa Pasko niadtong Disyembre 25.
Giakusahan ni Trump ang grupo nga iyang gitawag og mga terorista, nga kuno walay pili nga nagtarget ug nagpatay, ilabi na sa mga inosenteng Kristiyano.
Sa usa ka pamahayag atol sa Christmas holiday sa iyang home estate sa Palm Beach, miingon si Trump nga nagpahigayon ang US military og daghang tinuyong pag-atake batok sa Islamic group nga mga operasyon nga, sumala kaniya, ang Amerika lamang ang makahimo.
Matod pa niya, ilawom sa iyang liderato, dili nila tugotan nga mutubo ang radical Islamic terrorism.
Nagpahimangno usab si Trump nga mosunod pa ang daghang pag-atake kon ipadayon sa Islamic State group ang pagpatay sa mga Kristiyano.
Base sa US Africa Command, gikumpirma niini ang pag-atake sa amihanang utlanan sa Nigeria, ilabi na sa Sokoto state, diha sa pakigtambayayong sa Nigerian authorities.
Sa unang assessment, daghang ISIS nga terorista matud pa ang nangamatay sa ilang mga kampo.
Samtang si Nigerian Foreign Minister Yusuf Maitama Tuggar mibutyag nga kini usa ka joint operation nga nagtumong lamang sa mga terorista ug walay kalabotan sa bisan unsang relihiyon.
Matod pa niya, dugay nang giplano ang operasyon ug gigamitan og intelligence information nga gihatag sa bahin sa Nigeria.
Wala usab isalikway sa Punong Ministro ang posibilidad nga mosunod pa ang mga pag-atake, depende sa desisyon sa mga lider sa duha ka nasud.
