DAVAO CITY – Ginapaabot gihapon ang pagabpruba sa implementing rules ang regulations kon IRR sa No to Single Use Plastic Ordinance aron hingpit nang kasugdan ang mas lapad pang pagpatuman niini dinhi sa dakbayan sa Davao.
Gikanayon ni Rubylyn Baraquero, Information Education Campaign Unit sa Environment Waste Management Division sa CENRO, nga nasa-pinal na ang tanan apan wala pa napirmahan ni Mayor Sebastian Duterte ang proposed IRR.
Sumala pa ni Baraquero nga ginatutukan karon sa Davao City Solid Waste Management Board ang paggawas sa IRR aron sugdan na sab nila ang pagpahigayon ug inspection sa mga establisyamento.
Wala pa usab sumala pa masuta ang insaktong petsa alang sa approval sa IRR apan gikanayon ni Baraquero nga posibling malagdaan kini sulod karong tuiga.
Gumikan niini, dili pa hingpit nga mapatuman ang Ordinance No. 0500-21 kon “No to Single-Use Plastics” kalakip na sa mga barangay bisan ug naaprubahan na ni kanhi mayor ug karon Vice President Sara Duterte ang ordinansa niadtong pang tuig 2021.
Samtang sa pagkakaron, giusgdan na sa CENRO ang information and education campaign labot sa single-use plastics ug solid waste management, samtang ubay-ubay na ka mga kan-anan ang nagkambyo paingon sa biodegradable o reusable utensils.
Gimanduan usab ang pipila ka mga establisyamento nga mag-apply ug mobayad ug P10,000 aron makakuha ug special permit alang sa pagbaligya, pag-distribute, ug paggamit ug single-use plastics isip kabahin sa ilang requirements alang sa business registration.
via || Bombo AVC & Bombo LJF
