Gideklarar ni US President Donald Trump nga epektibo na matud pa ang ceasefire tali sa Iran ug Israel kagahapong adlawa, Hunyo 24.
Sa iyahang Truth Social account, gihangyo ni Trump ang duha ka nasud nga likayan ang paglapas sa kasamtangang ceasefire sa ikadose (12th) ka adlaw sa giyera tali sa duha ka mga nasud.
Bisan pa man niini, wala pa’y kumpirmasyon gikan sa kampo sa Israel kabahin sa kasabutan sa ceasefire nga maoy gipanghambog ni Trump isip kataposan sumala pa sa panagbangi nga nakapatay na og gatusan ka mga tawo sa Iran ug duha ka dosena sa Israel.
Pipila ka oras human sa pamahayag ni Trump, gilimod usab kini ni Iranian Foreign Minister Ababs Araghchi ug miingon nga sa pagkakaron, wala pay kasabutan alang sa ceasefire o hunong sa mga operasyon militar.
Apan, gipasabot sa Iranian official nga moundang lamang sila sa pag-atake kung buhaton sab kini sa Israel.
