Padayon ang pagpaulan og mga missiles ang Iran sa nagkadaiyang bahin sa Israel. Pipila sa mga naigo nga miresulta og pagbusikad ang lugar sa Tel Aviv ug sa Jerusalem.
Sumala sa Iran, ang maong lihok ilang tubag sa gihimong pag-atake sa Israel. Napugngan sab sa Israel ang pipila ka mga rockets nga gipalupad sa Iran gamit ang ilang Iron Dome defense system.
Gipanghambog sab sa Iran nga ilang naigo ang pipila ka military sites sa Israel. Tungod niini hilabihan ang kasuko ni Israeli Defense Minister Israel Katz sa gibuhat sa Iran tungod kay nadamay na ang mga sibilyan sa ilahang target.
Kahinumduman nga sa unang pag-atake sa Israel batok sa Iran, napatay ang pipila ka tag-as nga opisyal sama nila Gen. Hossein Salami, ang commander-in-chief sa Iran’s Revolutionary Guard, ug si Maj. Gen. Mohammad Bagheri, usa ka tag-as nga military official sa Iran.
Giakusahan sa Israel ang Iran nga nagpadayon kini sa pagpanday sa nuclear programme niini, apan kini gilimod sa Iran.
